Спомен за еден Рекански херој.
Сите го знаевме како човек кој помирува, одлично организира и практично дејствува, давајќи насоки како најбрзо да се постигне зацртаното. Беше тоа сега веќе далечната 2007/8, кога Хајан Селмани пристапи како уредник и администратор на Исламски Центар и форум, страница која без него немаше да функционира и да го добие својот сјај. Неколку години вложени во изградба на еден Форум кој за прв пат на овие простори понуди дебата, толеранција, меѓуверско разбирање и советување на најдобар можен начин и покрај поделбите кои го симболизираат нашето општество.
Хајан даваше огромен придонес од голем број технички аспекти, администраторски заложби, за да се дотера до сајт кој беше широко прифатен и посетен. Но, Хајан тука не прекина. Тој се заложи да претставува севкупен модел на еден млад и образован кадар кој паралелно со верскиот морален код ќе покаже и сестран етички работен пристап. И навистина, Хајан се покажа како претприемач, лидер, млад извршен директор со цел да влијае на заедницата и светот преку создавање иновации преку технологии. Основач и извршен директор на ХАСЕЛТ, компанија за развој на софтвер, дизајн и консалтинг, фокусирана на давање услуги и испорака на производи кои ги надминуваше очекувањата на клиентите, го подобруваше светот на технологиите и помагаше во растот на другите бизниси. Тој играше важна улога во успехот на повеќе домашни и странски компании, вклучени и во бизнисот и во технологијата. Како Микрософт МВП и познат експерт за технологија, тој беше вистински компјутерски научник и активен член на ИТ заедницата кој даваше деловни и мотивациони говорни ангажмани и обуки. Се отвори надеж на голем број програмери и ИТ инженери, муслимани и немуслимани, кои требаше да изградат една светска велесила во ИТ менаџмент, достојна да ја претставува Македонија во светот. Неговите големи цели и планови иако згаснаа за миг со неговото ненадејно преминување на подобриот свет, остави една плејада на млади истражувачи и етичари кои повторно ќе го возобноват моделот кој го претстави овој млад човек.
Рекански бисер
Хоризонтот на небесниот свод каде ѕвездената патека во вселената ги осветлува генијалните сонови на интелектот, кој успехот го шара како виножито исткаено врз Месечина, како добробит на овоземното. Љубовта кон светот со иманскиот оклоп на срцето каде аманетот на човештвото се носи, предава од генерација на генерација Реканскиот дух те понесува низ магичните лавиринти кое твоето око ги спозна, а за многумина беа само апстрактен поим. Навистина едно цвеќе не носи пролет, но ти си пролетта која донесе многу цветови… Кога модерната доба носи свои времиња, ти беше иноватор на тие светли тунели во кој патникот и работникот ги достигнуваа своите цели. Од прозорецот на масата го олеснуваше трудот на народите. Ти небеше од оние кои гледаат што може овој свет да стори за ТЕБЕ…НЕ! Туку ти беше борецот кој гледаше што можеш да му подариш на светот! Твоите младешки години не те спречија да имаш своја неизбришлива историја, успешна кариера… Светлосното знаење кое грееше над тебе беше плодородно под твојата узвишена сенка. Додека снегот паѓа врз косата на синот, на Мајката ѝ се леди срцето, додека врела солза по лицето ѝ се слева. Раната младост како искра под потковицата на коњот…Животот минува брзо… Кога небесите ќе те прегрнаат, шехадетот ќе сведочи за твојата победа. Кога крвта на шехидите и мастилото на учените ќе се вага, на Денот кога смртта ќе биде погубена , а ние проживеани. Нека Семоќниот Создател те проживее како победник, а Неговиот миленик (а.с) нека биде горд на тебе. Пехарот на наградата и вечниот престој нека ти биде џеннетул ФИРДЕУСОТ. (Посветено на Хајан Селмани – авторот е по порекло од Дебар, близок пријател на Хајан )
Хајан Селмани е роден во долнореканското село Велебрдо на 5 ноември 1985 година. Високо образование стекнал од областа на информатиката на Универзитетот на Југоисточна Европа, каде што дипломирал во 2008 и магистрирал во 2010 година. Во 2011 година бил одликуван со признанието Мајкрософт МВП. Таа титула ја доби уште шест пати. Во март 2013 година го основал претпријатието за изработка и инженерство на програмска опрема Хаселт кое успешно го менаџираше со голем број филијали низ целиот свет, меѓу кои во Скопје, Њу Јорк,Цирих и др. Селмани бил и познат мотивациски говорник со бројни предавања одржани на теми поврзани со претприемништво, технологија, водство и мотивација. Македонскиот Елон Маск почина ненадејно во Скопје на 17 септември 2019 година и остави трага во многу срца.
Во октомври 2019 година, во негова чест беше преименувано основното училиште во селото Ростуше со подрачни училишта во околните села Требиште, Велебрдо и Јанче.
Comments